QAT İdarə heyətində
Dünən QAT İdarə heyətinin növbəti toplantısı keçirildi. Təşkilati məsələyə baxıldı, 6 nəfər Təşkilata üzv qəbul edildi.
Ramil Səfərov və Qarabağ partizanları ilə bağlı məlumat verildi. R.Səfərovun heç bir formada müdafiə olunmaması, tamamilə yaddan çıxarılması ilə bağlı narahatçılıq bildirildi. Bu məsələyə dair bəyanatla çıxış edilməsi qərara alındı.
“Təslimçi sülhə doğru aparan Qarabağ danışıqları və cəmiyyət” mövzusunda iyunun 20-də saat 1200-da Beynəlxalq Mətbuat Mərkəzində Dəyirmi Masanın keçirilməsi haqda qərar qəbul olundu. Tədbirə geniş ictimai-siyasi dairələrin dəvəti ilə bağlı tapşırıqlar verildi.
Qarabağla bağlı ictimai və siyasi qurumların fəaliyyətinin əlaqələndirilməsi məqsədi ilə İşçi qrup yaradıldı. İşçi qrupa Ağsaqqallar Şurası və İdarə heyətinın üzvləri daxil oldular.
Minsk qrupu həmsədr ölkələrin səfirlikləri qarşısında və ölkə ərazisində ümumi aksiyaların keçirilməsinə dair ilkin müzakirələr keçirildi. Müzakirələrin davam etdirilməsi qərara alındı.
QAT-ın Ağsaqqallar Şurasının iclasının 25 iyunda, Ali Məclisin növbəti iclasının isə iyunun 28-də saat 1100-da Təşkilatın Mərkəzi qərargahında keçirilməsi qərara alındı.
Hazırkı vəziyyət müzakirə edildi, Minsk qrupu həmsədrlərinin bölgəyə gözlənilən səfərinin Azərbaycan üçün yaxşı heç nə vəd etmədiyi vurğulandı. Danışıqların dayandırılması üçün ictimai müqavimətin gücləndirilməsinin vacibliyi vurğulandı. Həmsədrlərin Dağlıq Qarabağa Ermənistan ərazilərindən səfər etmək cəhdlərinin qarşısını almaq üçün bəzi tədbirlər müəyyənləşdirildi.
Qarabağ Azadlıq Təşkilatı
Mətbuat Xidməti
18 iyun 2008
